آئی ٹی کی مدد سے پاکستان کی بڑی صنعتوں کی ایکسپورٹ میں اضافہ ممکن ہے

پاکستان کے لارج اسکیل مینوفیکچرنگ سیکٹر کو متعدد چیلنجز کا سامنا ہے جن میں محدود پیداوار، تحقیق اور تقی کے لیے سرمایہ کاری میں وسائل میں کمی جیسے مسائل سرفہرست ہیں تاہم انفارمیشن ٹیکنالوجی ان تمام مسائل کا دیرپا حل فراہم کرتی ہے، آئی ٹی سلوشنز کی مدد سے لارج اسکیل مینوفیکچرنگ سیکٹر خام مال کے حصول سے لے کر کسٹمرز تک تیار مصنوعات پہنچانے تک کے پورے عمل کی لاگت میں کمی لانے کے ساتھ کارکردگی اور استعداد میں اضافہ کرسکتا ہے۔

آئی ٹی کے ماہر اور اینٹی گریشن ایکسپرٹس کے بانی و سی ای او عمیر اعظم کا کہنا ہے کہ بڑی صنعتیں انفارمیشن ٹیکنالوجی سلوشنز کے زریعے اپنی پیداوار اور کارکردگی کو بہت بناکر ملک کو درپیش معاشی بحران سے نکالنے میں اپنا کردار بہتر طریقے سے ادا کرسکتی ہیں۔

انہوں نے کہا کہ ٹیکنالوجی دیگر فوائد مہیا کرنے کے ساتھ پاکستان کے مینوفیکچررز کی عالمی منڈیوں تک رسائی کو بھی آسان بناسکتی ہے اور صنعتیں اپنے کسٹمرز کی ضروریات کو زیادہ احسن انداز میں بروقت اور کم لاگت کے ساتھ پورا کرنے کی صلاحیت کو بڑھا سکتی ہیں، یہ اقدام گلوبل مارکیٹ میں پاکستان کی مسابقت بڑھانے میں اہم کردار ادا کرے گا۔

انہوں نے مزید کہا کہ آئی ٹی سلوشنز پاکستان کی بڑی صنعتوں کے سپلائی چین منجمنٹ، مارکیٹ میں نمایاں مقام دلوانے سمیت، سیلز اینڈ مارکیٹنگ کی سرگرمیوں کے ساتھ پیداواری آپریشنز کو مربوط و منسلک بنانے میں بھی مدد فراہم کرسکتے ہیں جس سے پاکستانی مینوفیکچررز اپنے کاروبار کو عالمی سطح پر فروغ دے سکتے ہیں۔